La corte, le arte, el fil de fer

Per ricordare un materiale tanto umile, quanto utile e versatile

Fin ai ani Zinquanta par la corte ghera de tuto, proprio de tuto, ma se te zercai on ciodo drito, na pinsa o un caciavide, no ghera verso de catarlo. No se comprava gnente e se na olta a l’ano da la fiera, el bupàportava a casa un qualche atrezo, noialtri butei erene i primi a ciapar in man sta novità. Un bel zugatolo che dopo un poco el se desmentegava in giro e quando el ghe volea par far el so servisio nol se catava più, alora sì che te lo sentei el bupà… e te lo sentei anca da distante…

Quando non te lo zercai più eco che lue l saltava fora, ma quando? De otobre quando se avea el brolo intorno a la casa o de marzo quando se vangava l’orto, ruzeno incanio… na setimana in moia nel petrolio… na netada e dopo el se tegnea da conto inteso.

In corte ghera de tuto o quasi… ma de na roba ghe n’era sempre, l’era el fil de fer. La storia del fil de fer la cominsia de luio quando ariva in corte la trebia e la pressa. Te li sentivi arivar da lontan con quele rue de fero sulla strada ingiarà e po, zonteghe anca che l’era un Landini che tirava sti bestioni de legno e de fero color arancion. Alora, finché i omeni i sistemava la trebia, du buteleti i vegnea messi subito a la machineta a preparar el fero par ligar le botole de paia e par far subito un poca de scorta. Sta machineta no l’era altro che on cavaleto de legno longo tri metri con un atrezo da na parte par farghe l’asola rodolando el fil de fer e da chelaltra ghera un altro trabicolo par tirarlo drito e taiarlo. Come emo dito du butei comisiava e altri, catii parché no ghera tocà a lori par primi, i spetava el so turno.

Che festa in corte quando se trebiava! Ogni botola de paia la gavea du feri e ogni matina in stala le vache volea almanco do botole, eco parché ghe nera a volontà. Sempre a disposision bastava andar a torselo, fato su a fissiole, dedrio la stala al portego.

Ghe n’era sì, ma guai a sprecarlo! El ghe volea par ogni laoro, ligar un seraio, tacar via el baldachin dei saladi, sistemar na finestra, tegner drito el cancano de la porta de la stala, par giustar la cedena de le vache, tacar su la lanterna a petrolio, farse na trapola par le tupinare e se ghe ne restava, ligar le fassine de legna. Olta che rivava la trebia in corte l’ano dopo l’era finio.

Anca le arte da laoro ogni tanto le gavea qualche rogneta e quanto fil de fer tegnea unito careti, tratori, versori, l’erpeghina e i finimenti dei cavai, no se podarà mai saverlo. Na cosa l’era più che sicura: se da un minuto a l’altro fusse spario el fil de fer, se fermava tuto e quel che mancava bisognava farselo. Con du zercioni de bicicleta veci, passando el fil de fer nei busi dei razi se ghe fasea intorno na rete e vegnea fora un bel corgo par la cioca e i pulsini. Ma questo l’era el laoro del nono che stando sentà su la so caregheta picola, là alombria soto el zirezar, erela una setimana erele do, pian pian el corgo el vegnea finio.

E gnanca a dirlo, el fil de fer nol podea mia scaparne a noialtri butei che giraene par la corte. Zugatoli no ghe n’era, alora bisognava inventarse calcosa, cosita noialtri copiando le arte dei grandi se faseene i nostri tratorini, caretini, versoreti e altre robete impirlando con le mane el fil de fer.

No ghera altro ma non ne mancava gnente… E adeso… ma pensa ti, dopo quasi sesant’ani me son meso ancora a impirlar con le mane el fil de fer e ghe fao veda ai buteleti che i diei non i serve mia solo par schisar botoni.

Stefano Settin, da Concorso Letterario in Lingua Veneta “Mario Donadoni”, Bovolone, 2012

Rispondi

Inserisci i tuoi dati qui sotto o clicca su un'icona per effettuare l'accesso:

Logo di WordPress.com

Stai commentando usando il tuo account WordPress.com. Chiudi sessione /  Modifica )

Foto Twitter

Stai commentando usando il tuo account Twitter. Chiudi sessione /  Modifica )

Foto di Facebook

Stai commentando usando il tuo account Facebook. Chiudi sessione /  Modifica )

Connessione a %s...