LE GRASSIOLE DE OCO

di Bruno Rossato

No gh’era famea de campagna un po’ sioreta che no la tegnea un s-ciapo de ochi se la gavea na butela da maridar. No gh’era fiola che in dota la se portava via el leto de pena e l’imbutida de piumin. Sposar una de campagna volea dir che la gavea el cul interà, par la dote siora che la portava.

El 25 de Novembre, giorno de Santa Caterina, se copava l’ocatina, da quel giorno in avanti la pena dei ochi l’era pronta da pelar; el mas’cio l’era roba par i omini, le oche par le done. El giono stabilìo, me nona la ciamava le so amiche, la comare, la sorela, l’amica che stasea vizin la moier del boaro. Iera tute infazendé par tirarghe el col a sti pori ochi. par pelarli. La pena se l’era fata l’era facile, se l’era ancora indrio le done le se rovinava i diei, inveze el piumin la le fasea me nona, quelo l’era un piumin da levar.

Dopo ie brustolava dal piumin che ghe restava, i ciapava ‘na fassina de canari, che quei i fasea ‘na bela fiama, e iera pronti par desfarli zo.

Come el mas’cio, no se butaa via gnente, anca de lori se tegnea tuto: el col par far el minestron, i ossi i se magnava prima che i ciapesse l’ìspio, co le buele i fasea le tripe, co la reguesta e el figadin se fasea le taiadele par le feste, le ochette le se metea soto sal par l’istà, e co la pel se fasea le grassiole.

Una sbrancà de grassiole in casa volea dir averghe el rosolio! ‘Na scuciarà de grassiole co la polentina apena fata l’era la zena par noaltri buteleti, me nona la se ne tegnea na scudela: l’era inbisogno par contentarne. El resto la ghe lo dasea a le done che iera vegnù a iutarghe, l’era la so riconossenza par l’aiuto dato. La ie scartozava ne la carta de formaio parché le se mantegnea par un bel toco. Messe in caneva ne la moscarola, le se magnava un spizeghin ala olta, ogni tanto, quando te gavei oia de roba bona.

Annunci

Rispondi

Inserisci i tuoi dati qui sotto o clicca su un'icona per effettuare l'accesso:

Logo WordPress.com

Stai commentando usando il tuo account WordPress.com. Chiudi sessione /  Modifica )

Google photo

Stai commentando usando il tuo account Google. Chiudi sessione /  Modifica )

Foto Twitter

Stai commentando usando il tuo account Twitter. Chiudi sessione /  Modifica )

Foto di Facebook

Stai commentando usando il tuo account Facebook. Chiudi sessione /  Modifica )

Connessione a %s...