Voci de la Corte Vignalon: Cerea

di Giuliano Meneghello

corte vignalon

Son passà davanti a la corte Vignalon a Cà del Lago de Cerea dove son nato e vissù 10 ani.

O’ sentio na streta al còr e na oze che me disea: “Vien gò da parlarte!”

O’ inciodà la machina, ò fato retromarcia e me son fermà davanti al porton, l’ò urtà, son entrà e son dà davanti a la Madona, l’ò saludà e ò inciavà i oci: subito i ricordi de la me infanzia i me vegnù in mente.

E rivedo e risento na gran confusion nel granar, tra la me casa e quela del paron, dove i metea el formento e la polenta, con la porta che dava sul selese: l’è el matrimonio de me zia Gina, gran festa e gran magnada de risoto e de caponi.

E rivedo e risento me nono Jòane che sbraia: “Ciamè el vetrinaio, ghe i bo massaa sgionfi de ladin, bisogna far presto senò i more.” Rivà el vetrinario, el ghe pianta el tre quarti ne la panza e dal buso se sente fis-ciar el gas che vien fora. I bò iè salvi. A la sera, prima de ‘ndar in leto, ò sentio, ne la so camara, me noni che ringraziava el Signor parché i bò no i era morti.

E rivedo e risento un ciasso de bandoti sbatui e urli de noaltri buteleti atorno al vegneto: l’era autuno e la ùa l’era maura e la ghe fasea gola a i storlini che i vegnea a mile, tuti uniti ccome ‘na nuvola, pronti a posarse su le vegne e far strage de ùa. Ma noaltri buteleti, col ciasso dei bandoti ghe impedèeno de postarse su le vegne.

E rivedo e risento la cavala “Stela” che nitrise e con la testa la zerca de alzar so fiola, la cavalina che gavea apena un mese de vita ma l’era malà. I la tegnea solevà con un’imbragadura ma la stava morendo e so mama, come tute le mame del mondo, la volea salvarla col so muso che le carezava e la ne guardava come par dirne: “Juteme!…”. La cavalina però l’à tirà l’ultimo respiro e l’à sbassà la testa. Tuti quei che gh’era intorno i sa sugà i oci de scondon, l’era una de noaltri, l’era de la corte, omini e bestie i condividea el stesso destin.

E rivedo e risento ‘na s-ciopetà e un can che urla dal mal. L’è “El Sperù” e Rafaelo el gà sparà la prima s-ciopetà par coparlo drento el so casoto parché l’era diventà rabioso. Ghe volèeno tuti ben. Me nono Joane el pianzea parché “El Sperù” el gavea jutà tante olte a tirar el careto co i bidoni del late fin al caseificio de Paride a Cerea.

E rivedo e risento oze de done che le sbraia: “Giuliano fa presto che ghemo sé…” e mi rivava con un palo su la schiena chel tegnea un secio de acqua par parte col cazoto drento e, passando tra ‘na fila e l’altra de done che zapàva, ghe portava l’acqua fresca che l’era tanto desiderà soto chel sol che scotava e volea dir anca un momento de sosta da la fadiga de zapar.

Seguiranno altre “visioni”.

Annunci

Rispondi

Inserisci i tuoi dati qui sotto o clicca su un'icona per effettuare l'accesso:

Logo WordPress.com

Stai commentando usando il tuo account WordPress.com. Chiudi sessione /  Modifica )

Google photo

Stai commentando usando il tuo account Google. Chiudi sessione /  Modifica )

Foto Twitter

Stai commentando usando il tuo account Twitter. Chiudi sessione /  Modifica )

Foto di Facebook

Stai commentando usando il tuo account Facebook. Chiudi sessione /  Modifica )

Connessione a %s...