‘N omo de la Lessinia

—“Coando mi son nà a la visita de leva, e i m’à misurà, s’era alto ’n metro e novantacoatro centimetri, e coéi che i éra de chela misura lì, i naséa, se i voléa e se i superàa le proe a far la goardia del re a Roma. A mi m’è stà domandà e mi prima m’ò fato spiegar e dopo go dito che mi magno senpre par du, digo du piati de patate o du piati de polenta co’l conpanàdego, ma mi go piassè forsa de i altri òmeni e anca de me fradèi. Dopo i m’à dito che là ciapo la paga, e na bela paga. Son sta consilià de nar a casa a domandarghe a i me genitori e doman tornar al distreto. Mi go risposto, che a nar a pié fin a casa de note e tornar de òlta no’l ghe la fasso mia ’n te na note, e cossì ghe son nà du dì dopo.Me bupà e me mama i éra contenti e cossì ò fato tute le proe. De lèsare s’éra bon, ò fato fin a la tersa, anca a far i conti me rangiàa. Dopo i à volù tante pìcole cose, come canbiar vestito ’n pressia, ’nguidar guide, senpre de pressia, l’ultima proa l’éra saltar su ’n caval alto, vegnendo de corsa dal de drìo, e saltar, prima su na pedana, e dopo su la sèla. Mi par la paura de no’ fàrghela, ò saltà ’ia ’l caval e son nà sul Marassial che, davanti, ’l tegnéa ferma la bestia. –Abile! Abile!- i m’à dito. Cossì so nà a Roma, ò fato du mesi de scola militare e dopo s’éra goardia del Re.

Du dì faséimo servissio e du dì i ne daséa riposo. Mi ne i dì de riposo, naséa a far ’l scaricator ’n te ’n gran magasin. Cargar e descrgar sachi da méso quintal o da ’n quintal. I me pagàa ben, s’éra ’l pi forte de tuti. I schei che ciapàa ghe i mandàa a me mama e faséa musina. ’N coalsiasi posto che mi magnàa, senpre me faséa portar ’l dopio de i altri, e no’ reclamàa nessun. Là ’n caserma con mi, ghéra ’n romano, che faséimo senpre servissio ’nsieme, ma l’era ’n po’ ’n birbante, no ’l ghéa mia de le bele conpagnìe, cossì na sera ’l m’à domandà se vao a séna con lu: “Pago mi – ’l me dise – ma dopo ghen da dàrsele con na scoadra che ne rompe i piani. Te vegni e coando te digo: – Maca (pugna), ti te me difendi.” No’ l’éra roba par mi, ma par l’amicissia ghe son nà e coando l’è stà ora de le bòte, e che ’l m’à dito ‘maca’, no’ voléa dar pugni, ma ciapàa ’n omo a la òlta e el slansàa sul muro, e cossì, ’n du e du coatro, i altri i è scapè. Ma lì, che à ’isto la bega, ghéra uno de coéi che organisàa ’ncontri de pugilato, e ’l m’à ciapà par man e ’l m’à dito se vòi fa ’l pugilato.

– Te ciapi dei bei schei e te ghè solo da pugnar.

Mia tanto convinto, ma ò acetà. Ogni ’ncontro ’l me pagàa ben, e mi vinséa senpre e così faséa musina e ghe mandàa i schei a me mama. A védare ’ste sfide, ghéra senpre de pi gente e mi ciapàa senpre de pi. Ma ’n bel dì, me ’riva na létera da me mama, e la vol saér da ’ndo ’riva tuti ’sti schei. Mi con calma ghe rispondo e par risposta me mama la me scrive:

– Mi t’ò senpre dito che no’ te ghè da darghe pugni a nessuni, éto capìo, fiol? Lassa lì subito de pugnar, sinò vegno a torte e te porto a casa!

Del resto, me mama la ghéa reson; fin da buteleto, la m’à senpre dito de no’ darghe pugni a nissuni. Daghe urtoni, che i vàa par tera, ma pugni a nissuni. E cossì, no’ son pi nà a far pugilato. E chel’omo là del pugilato l’è vegnù tante òlte ’n caserma a védare se ò canbià idea, ma mi ò senpre fato coel che me diséa me mama. …

Con i schei che mi go mandà a casa, uniti a pochi altri che ghéimo, emo conprà casa e canpi a le Basse ’ndo stemo mi e me fradèi, con le nostre fameje. E dopo tri coatro ani che érimo a le Basse, ghéimo na stala piena de bestie e i granari pieni de polenta e de formento.” …

L’Italia la podéa ’érghe vù ’n altro Carnera.

di Luigi Ederle da “Quatro Ciàcoe”, settembre 2018

Rispondi

Inserisci i tuoi dati qui sotto o clicca su un'icona per effettuare l'accesso:

Logo di WordPress.com

Stai commentando usando il tuo account WordPress.com. Chiudi sessione /  Modifica )

Google photo

Stai commentando usando il tuo account Google. Chiudi sessione /  Modifica )

Foto Twitter

Stai commentando usando il tuo account Twitter. Chiudi sessione /  Modifica )

Foto di Facebook

Stai commentando usando il tuo account Facebook. Chiudi sessione /  Modifica )

Connessione a %s...